Јужна Европа се бори со огнената стихија: Франција, Грција, Шпанија и Португалија на удар

Шумските пожари продолжуваат да беснеат низ јужна Европа, принудувајќи илјадници жители да ги напуштат своите домови, додека високите температури и силниот ветер дополнително ја влошуваат состојбата.

— реклама —

Најкритично е во југозападниот дел на Франција, во близина на Перпињан, каде што повеќе од 700 пожарникари, со поддршка од специјализирани авиони, се борат со голем пожар што досега зафатил околу 4.600 хектари. Од погоденото подрачје се евакуирани повеќе од 10.000 жители.

— реклама —

Поради опасноста од пожарите, француските власти донесоа одлука третата етапа од велосипедската трка Тур де Франс низ Пиринеите да се одржи без присуство на публика.

Пожари се активни и во Португалија, Шпанија и Грција, каде што заедно уништиле повеќе од 19.000 хектари земјиште. Во Солун огнот зафати две фабрики, по што беа евакуирани околните населби, додека жителите добија препорака да не ги отвораат прозорците поради густиот чад.

— реклама —

Во Шпанија, пожарот во близина на Коста Брава уништи повеќе од 2.200 хектари за само два дена, а властите предупредуваат дека новиот топлотен бран, со температури до 40 степени, ќе го отежне справувањето со огнената стихија.

— реклама —

Пожари се регистрирани и во Хрватска и Албанија, а метеоролозите најавуваат дека екстремно високите температури во текот на неделата ќе се прошират и кон северните делови на Европа.