Како се ваделе парите од ѕидот кај родителите на Ристов: Криминалистички техничар сведочеше за претресот, одбраната докажува пропусти

Вишиот криминалистички техничар Горан Манојловиќ, кој учествувал во документирањето на претресот во куќата во Неготино, каде што беа пронајдени парите поврзани со судскиот предмет за судијата Ѓоко Ристов, на денешното судење изјави дека нема лиценца или сертификат, а процедурите при вршење претрес ги познава делумно.

Одговарајќи на прашањата на одбраната, Манојловиќ потврди дека бил повикан од претпоставен старешина, како дежурен криминалистички техничар, за да изврши криминалистичко-технички активности на местото на претресот.

Тој објасни дека при вакви интервенции техничарите одат со опрема потребна за документирање и обработка на местото на настанот.

— реклама —

Кога пристигнал во куќата, забележал дека дел од ѕидот бил отворен, по што неговите колеги почнале да вадат снопчиња од скривницата.

„Видов дека има нешто рушено од ѕидот. Колегите пристапија, рекоа дека тука има нешто и почнаа да вадат некои снопчиња“, сведочеше Манојловиќ.

На прашањето колку лица биле присутни во просторијата, одговори дека имало повеќе од четири-пет луѓе. Потврди и дека не носел заштитни навлаки за обувките, додека за останатите присутни не знаел дали користеле таква опрема.

„Јас не носев навлаки за обувките. За другите не знам, не забележав“, рече сведокот.

— реклама —

Манојловиќ не можеше да потврди дали за време на активностите бил воден записник, ниту дали некој од присутните влегувал или излегувал од просторијата.

Во испрашувањето беше отворено и прашањето за биолошките траги. Техничарот изјави дека од него не бил земен брис.

За начинот на постапување со пронајдените пари, Манојловиќ раскажа дека на подот пред ѕидот била поставена криминалистичка вреќа што ја побарале од него, а врз неа биле оставани извадените снопчиња.

— реклама —

„Долу пред ѕидот имаше криминалистичка вреќа. Побараа, им дадов за пакување, ја постелија долу на плочките и ги ставија парите на неа“, рече тој.

Според неговото сеќавање, колегата што ги вадел парите од скривницата носел ракавици.

На прашањето дали биле земени брисеви од подните плочки врз кои била поставена вреќата, одговори негативно.

Манојловиќ потврди дека ги фотографирал ѕидот и местото по вадењето на парите, користејќи службен фотоапарат „Никон“.

Во текот на испрашувањето обвинителството го постави и прашањето зошто одбраната го предложила токму Манојловиќ како сведок, со оглед на тоа што тој не раководел со претресот. Техничарот потврди дека не бил раководител на претресот.

При поставувањето прашања, одбраната му покажуваше фотографии од претресот, на што обвинителството реагираше со забелешка дека адвокатот го изложува сведокот на притисок за да добие одговори што му одговараат.

Сведочењето на Манојловиќ се однесуваше на начинот на кој биле пронајдени, фотографирани и поставени парите при претресот, како и на условите во просторијата и постапувањето на присутните службени лица.