Популарното француско летувалиште Сен Жан де Луз на атлантскиот брег воведе нови ограничувања за консумирање алкохол на јавни места, вклучително и на плажите, со цел да се намалат ноќните забави и нарушувањето на јавниот ред.
Според новите правила, лицата кои во вечерните часови ќе консумираат алкохол на плажите може да бидат казнети со парична казна до 150 евра.
Мерката се однесува на трите најпосетени градски плажи – Гранд Плаж, Плаж д’Еромарди и Плаж де Лафитенија. Локалните власти наведуваат дека проблем претставуваат големите групи кои по затворањето на кафулињата и рестораните продолжуваат со забавите покрај морето.
Од општинската полиција појаснуваат дека целта не е да се казнуваат туристите кои преку ден мирно уживаат на плажа со пијалак, туку да се спречат доцните ноќни собири, бучавата и нарушувањето на јавниот ред.
Полицијата ќе ја проценува секоја ситуација поединечно, а засилените контроли ќе бидат насочени кон масовните вечерни собирања.
Слични ограничувања веќе се применуваат и во други туристички дестинации. Во хрватската Макарска е забранета продажба на алкохол во продавници, киосци и пекарници во текот на ноќта, додека во Сплит и Дубровник за консумирање алкохол на одредени јавни површини се предвидени казни до 300 евра.
Уште построги се правилата на шпанските Балеарски Острови, каде што за пиење алкохол на улица или на плажа казните се движат од 500 до 1.500 евра.
