Околу 2.100 странци од Ирак и земјите од Западен Балкан, за кои веќе има решенија дека треба да ја напуштат Германија или да бидат депортирани, биле или се предмет на околу 12.000 истражни постапки, објавува „Kölner Stadt-Anzeiger“, повикувајќи се на податоци од Заводот за борба против криминалот во Северна Рајна-Вестфалија.
Податоците се однесуваат на околу 6.800 странци евидентирани во само два центра во Уна и Косфелд. Меѓу истрагите има случаи за убиства и нанесување телесни повреди, силувања, кривични дела поврзани со дрога, измами, провали, грабежи и кражби. Од достапните податоци, сепак, не е познато колку од истрагите прераснале во кривични постапки и колку лица на крајот биле осудени.
Особено внимание привлекува список од 471 лице што во ноември 2024 година бил испратен од централната служба во Косфелд до службата за странци во Келн. Станува збор за лица од Србија, Македонија, Босна и Херцеговина, Албанија и Косово, кои требало да ја напуштат Германија.
Косфелд понудил помош при обезбедувањето привремени патни исправи за оние кои немаат пасоши, со цел да се овозможи нивна депортација. Од Келн, меѓутоа, пристигнал одговор од одделот задолжен за 218 лица дека таквата помош не е неопходна, бидејќи се разгледувало како на дел од нив да им се овозможи траен престој во Германија. Во меѓувреме, 40 лица биле отстранети од списокот на оние што би можеле да останат.
Случајот предизвика политички реакции во Келн, при што критичарите ја обвинија градската администрација дека намерно ги попречува депортациите. Пратеникот на владејачките демохристијани, Детлеф Зајф, оценил дека станува збор за „еклатантно непочитување на сојузните насоки“.
Од градските власти, пак, по првичната проверка отфрлиле дека депортациите биле паушално одбивани или спречувани. Сепак, останало нејасно зошто на барањето од Косфелд не било одговорено централно и сеопфатно, како и во колку случаи воопшто бил направен обид за депортација.
За реализација на депортацијата потребно е државата на потекло да го прифати враќањето на лицето, а полицијата да го пронајде во моментот кога е планирано неговото враќање. Токму тоа, според германските медиуми, често претставува сериозна пречка.
Дополнително, „Kölner Stadt-Anzeiger“ наведува дека во двете години по испраќањето на списокот, дури 152 лица од него повторно биле предмет на истраги поради сомнение за кривични дела.
Случајот има и поширока политичка димензија во Германија, во период кога десничарската Алтернатива за Германија (AfD) ја засилува кампањата против нелегалната миграција и бара поголем број депортации.
Од подрачјето на Келн минатата година биле депортирани 245 лица, а годинава досега 115. Повеќе од половина од нив биле евидентирани како сторители на кривични дела, додека околу една третина биле вратени во земјите од Западен Балкан.
