Клековски: Околу 1.000 нови случаи на рак на дојка годишно, се преиспитува скрининг-програмата

Околу 1.000 нови случаи на рак на дојка се регистрираат годишно во Македонија, а во моментов околу 7.000 пациентки се лекуваат или се лекувале од ова заболување, изјави министерот за здравство Сашо Клековски на „Розовиот пикник појадок“ во Паркот кај Школка, во организација на ХЕМА-ОНКО.

Клековски истакна дека подигнувањето на свеста за ракот на дојка останува приоритет, а особено важно е болеста да се открие навреме.

— реклама —

Како еден од главните проблеми ја посочи скрининг-програмата за рак на дојка, која, според извештај на Државниот завод за ревизија, е неуспешна.

„Мораме комплетно да го премислиме концептот и се надевам многу бргу, заедно со ХЕМА-ОНКО, ќе промовираме нов концепт за скрининг-програмата“, рече Клековски.

Тој информираше и дека два лека за рак на дојка се ставени на позитивната листа, со што пациентките кои примаат хронична терапија можат да ги подигнуваат лековите во аптеките, наместо да доаѓаат во Клиниката за онкологија.

— реклама —

Според Клековски, снабдувањето со лекови во моментов е стабилно, но Министерството за здравство анализира дополнителни мерки за надминување на прекините во испораката на терапијата.

Тој потсети и дека од минатата година е обезбедена дополнителна финансиска поддршка за Клиниката за торакална хирургија и Клиниката за пластична хирургија, со цел реконструктивните зафати да се изведуваат веднаш по оперативниот третман.

— реклама —

„За нас тоа не е само естетско прашање, туку прашање на психофизичкото здравје и квалитетот на живот на жените кои се соочиле со оваа болест“, нагласи Клековски.

Од ХЕМА-ОНКО посочија дека редовните самопрегледи и раното откривање можат значително да ги зголемат шансите за успешно лекување. Ана Марјановиќ истакна дека, иако во моментов нема функционална скрининг-програма, жените можат преку редовни самопрегледи навреме да забележат промени и да побараат лекарска помош.

Марјановиќ информираше и дека годинава е воведен тумор-борд за третман на рак на дојка, во кој одлуките за лекувањето ги носи мултидисциплинарен тим, составен од онколози, торакални хирурзи, радиолози и патолози.

— реклама —

На настанот свои искуства споделија и пациентки кои се лекуваат од рак на дојка, упатувајќи порака дека за болеста треба отворено да се разговара, да се бара поддршка и редовно да се вршат самопрегледи.

Организаторите истакнаа дека ваквите собири придонесуваат за рушење на стигмата поврзана со болеста и за охрабрување на жените навреме да побараат помош и поддршка.