Во организација на Министерството за здравство и Фондот за здравствено осигурување, со поддршка на Светската здравствена организација (СЗО), денеска во Владата се одржа работилница посветена на унапредување на системот за управување со боледувањата во Македонија.
На работилницата беа презентирани податоци за состојбата во земјава, предизвиците со кои се соочува системот, како и европски практики и искуства што би можеле да придонесат за негово подобрување.
Министерот за здравство Сашо Клековски истакна дека целта е да се обезбеди баланс меѓу намалувањето на административните процедури и зајакнувањето на контролите таму каде што постои ризик од злоупотреба на боледувањата.
Тој посочи дека интегрираните податоци од системот „Мој термин“ покажуваат оти во 2025 година бројот на боледувања до 30 дена е зголемен за 33 проценти во однос на 2021 година, достигнувајќи повеќе од 300.000 боледувања.
„Бројот на корисници на боледување не е значително променет. Додека боледувањата се зголемени за 33 проценти, бројот на корисници е зголемен за околу шест проценти. Просечното користење на боледување по осигуреник пораснало од 1,8 на 2,3 проценти“, рече Клековски.
Министерот нагласи дека правилата за боледување не се ревидирани од 2012 година и дека, иако нивното спроведување е во надлежност на Фондот за здравствено осигурување и системот „Мој термин“, потребен е поширок пристап при нивното унапредување.
На работилницата учествуваа претставници на лекарските здруженија, експерти од Словенија, како и претставници на Министерството за економија и труд, синдикатите, работодавачите, стопанските комори, Државниот инспекторат за труд, Министерството за социјална политика, Министерството за дигитална трансформација и здруженијата на пациенти.
