Клековски во Кичево: Новата болница е цел, но не чекаме — кичевската болница напредува уште сега

Министерот за здравство Сашо Клековски денеска ја посети Општата болница во Кичево, каде заедно со директорката д-р Маја Цветаноска Трајковска и градоначалникот Александар Јовановски говореа за развојот на установата, новата опрема и плановите за изградба на нова болница.

Клековски истакна дека изградбата на нова болница останува цел, но дека подобрувањето на здравствените услуги во Кичево не може да се одложува до реализацијата на тој проект.

„Новата болница е наша цел и активно работиме на реализација на овој проект. Но, граѓаните на Кичево и околината не можат да чекаат додека таа се изгради. Затоа, не чекаме – болницата ја зајакнуваме уште сега, со нова опрема, нови услуги и нов кадар“, изјави Клековски.

— реклама —

Како дел од подобрувањата во болницата, во 2025 година се воведени повеќе нови апарати и услуги. Меѓу нив се имунолошки апарат за анализа на тумор-маркери, хормони, Д-димери, срцеви маркери и алерголошки панели, како и гасен анализатор за брза процена на итни и тешки пациенти.

Болницата добила и нов анестезиолошки апарат со капнограф и ново ЛЕД-операциско светло, а во тек е набавка на видеоларингоскоп и автоклав. Дополнително, набавен е нов гастроскоп за подобрување на дијагностиката.

Во однос на кадарот, трајно се вработени четворица специјализанти и четворица доктори по општа медицина, додека постапката за уште пет специјализанти е во завршна фаза.

— реклама —

„Опрема без кадар не значи ништо, а кадар без опрема не може да работи. Во Кичево ги градиме двете истовремено – за пациентот да добие дијагноза и лекување тука, во својот град, без да патува до Скопје“, истакна Клековски.

Директорката на болницата, Цветаноска Трајковска, ја истакна важноста на новата опрема во радиологијата. Болницата добила нов дигитален рендгенски апарат, нов дигитален мамограф и ехо-апарат 3Д/4Д со еластографија, донација од Општина Кичево.

Во РТГ-кабинетот во 2025 година биле реализирани околу 19.500 прегледи, меѓу кои рендгенски прегледи, компјутеризирана томографија, мамографии и ехо-прегледи на дојка.

— реклама —

Според директорката, новиот имунолошки апарат „Siemens ImmuLite 2000 System“ овозможува анализи кои претходно не можеле да се прават во установата, додека биохемиската лабораторија годишно опслужува меѓу 28.000 и 30.000 пациенти.

Гасниот анализатор „EDAN“ е наменет за брза процена на метаболичкиот и респираторниот статус, особено кај итни и тешки пациенти. Новиот анестезиолошки апарат „Dräger Fabius plus XL“ со капнограф овозможува подетално следење на пациентите за време на интервенциите.

Во оперативниот блок годинава биле извршени повеќе од 200 хируршки интервенции, додека со новиот гастроскоп биле направени околу 100 прегледи.

Градоначалникот на Кичево, Александар Јовановски, порача дека кичевчани заслужуваат нова болница и дека Општината ќе продолжи да ја поддржува реализацијата на проектот.

Тој потсети дека Општина Кичево неодамна донирала ехо-апарат 3Д/4Д со еластографија, кој веќе се користи за потребите на пациентите.

„Сè што е во наша можност, ќе направиме за граѓаните да добиваат квалитетна здравствена заштита во својот град“, истакна Јовановски.