Од Левица преку соопштение обвинуваат дека скандалот со незаконски исплатени социјални пензии и додатоци за туѓа нега во Центарот за социјални работи во Тетово добива нови размери, тврдејќи дека социјална пензија добил и роднина на вработен во институцијата.
Според партијата, и покрај тоа што дел од вработените во Центарот биле опфатени со постапка на Јавното обвинителство и признале вина за несовесно работење во службата, тие продолжиле да работат, а злоупотребите, како што велат, не престанале.
„Ова отвора сомнежи дека станува збор за поширока мрежа на злоупотреби и покажува дека или не постои никаква контрола или намерно ваквите случаи се игнорираат од страна на министерот Фатмир Лимани“, стои во соопштението од Левица.
Од партијата во соопштението посочуваат дека инволвираните лица, иако биле задолжени да платат по 18.000 денари по признание на вина, останале на своите работни места.
Левица во соопштението обвинува дека Министерството за социјална политика не одговорило на нивните претходни барања за расчистување на случајот и оценува дека молкот на институциите претставува „премолчено одобрување и соучесништво во криминал и корупција“.
Партијата преку соопштението бара темелна истрага, јавна отчетност и конкретни санкции за сите инволвирани лица, нагласувајќи дека „социјалната заштита не смее да биде приватен канал за злоупотреба“.
