Платформата „Православно секојдневие“ објави реакција по бројните коментари и објави на социјалните мрежи по смртта на музичарот Владо Јаневски, оценувајќи дека политичките поделби не смеат да бидат причина за омраза кон човек, ниту повод за злорадост по неговата смрт.
Во текстот со наслов „Владо Јаневски и срамот на лажниот патриотизам“, авторите посочуваат дека музиката на Јаневски оставила силен белег кај повеќе генерации и дека тоа претставува вредност што не треба да се засени од политички несогласувања.
„Тоа не се мери со пароли. Тоа не се мери со политички етикети. Тоа се мери со трагата што човек ја остава во срцата на луѓето“, се наведува во објавата.
Во реакцијата се осудуваат навредите и политичките пресметки што се појавија на социјалните мрежи по смртта на пејачот, а особено се критикуваат оние кои, како што наведуваат авторите, се претставуваат како патриоти и православни христијани.
„Тука мора јасно да се каже: тоа нема никаква допирна точка со православието. Тоа не е ни човечност, а камоли христијанство“, пишува во текстот.
Авторите нагласуваат дека секој има право на различни политички ставови, но дека несогласувањето не смее да премине во омраза и етикетирање.
„Кога целиот живот и делата на еден човек ги сведуваме на една политичка етикета, тогаш повеќе не зборуваме за него. Зборуваме за себе. За тоа колку сме дозволиле омразата да ни го замати погледот“, стои во објавата.
Во заклучокот се порачува дека вистинскиот патриотизам не се докажува со навреди, злорадост и поделби, туку со љубов кон ближниот, одговорност и дела што го градат општеството.
„Господ да го помилува покојниот. А нам да ни даде разум, трезвеност, разбирање и единство“, се наведува во завршницата на текстот.
