Ле Пен се закани со повлекување од претседателската трка – една судска одлука може да промени сè

Лидерката на француската крајна десница, Марин Ле Пен, изјави дека нема да се кандидира на претседателските избори следната година доколку Апелацискиот суд во Париз ѝ одреди носење електронска нанараквица како дел од казната во случајот за злоупотреба на средства од Европската Унија.

Апелацискиот суд треба да ја донесе конечната одлука за пет дена.

— реклама —

Ле Пен поднесе жалба на пресудата од март 2025 година, со која таа и други членови на нејзината партија „Национален собир“ беа прогласени за виновни за злоупотреба на средства од Европскиот парламент. Според пресудата, во периодот од 2004 до 2016 година биле вработувани асистенти кои наместо за Европскиот парламент работеле за партијата.

Таа ги негира обвинувањата дека била во центарот на системот за злоупотреба на европски средства.

— реклама —

„Ќе се кандидирам ако ми биде овозможено тоа, но само доколку можам слободно да водам кампања. Ако формално ми дозволат кандидатура, а практично ме спречат да ја водам кампањата, тогаш тоа нема да биде можно“, изјави Ле Пен за телевизијата LCI.

— реклама —

На прашањето дали електронската нанараквица би била главната пречка, таа одговори потврдно.

„Не можам да зависам од судија кој ќе ми одобрува дали можам да одам на предизборен митинг или да посетам пазар. Ако ми биде оневозможена кандидатурата, ќе ги искористам сите правни средства што ми стојат на располагање“, рече Ле Пен.

— реклама —

Доколку судот ја потврди првостепената пресуда, таа би можела да добие забрана за вршење јавна функција, електронски надзор или комбинација од двете мерки.

И покрај судскиот процес, Ле Пен и понатаму важи за фаворит за наследник на актуелниот француски претседател Емануел Макрон. Доколку не може да се кандидира, како најверојатен кандидат на крајната десница се споменува нејзиниот политички соработник Жордан Бардела.