Претставници на Лекарска комора на Македонија оствариле средба со министерот за здравство Азир Алиу, на која биле отворени повеќе актуелни прашања поврзани со работата на докторите и одржливоста на здравствениот систем.
Во рамки на средбата била водена конструктивна дискусија, при што биле мапирани клучните предизвици и разгледани можните решенија за унапредување на здравствената заштита.
„Докторите се еден од носечките столбови во обезбедувањето на здравствената заштита. Тие генерално ја вршат својата работа одговорно и совесно, и првенствено се ориентирани кон подобрување на квалитетот и обемот на работата, согласно условите за работа и законската регулатива за соодветно валоризирање на вложениот труд“, соопштија од Лекарската комора.
Од Комората потенцираат дека одговорноста во здравствениот систем не смее да се генерализира, туку неправилностите треба да се утврдуваат по законски пат.
„Одговорноста не треба да се генерализира, напротив, исклучоците и неправилностите преку пропишаната законска постапка треба да се докажат и санкционираат. Спротивно на ова, генерализирањето на состојбите и одговорноста, наместо прогрес и надградување, ја зголемува недовербата во сите здравствени работници и во целокупниот здравствен систем“, соопштија од Комората.
Во дискусијата била истакната и потребата од подобрување на организацијата во здравствените установи, како и зајакнување на контролата во примената на законската регулатива.
„Потребно е унапредување на организацијата на здравствените установи и контрола во имплементацијата на законската регулатива со вклучување на директорите и надлежните институции“, соопштија од Комората.
Од таму нагласуваат дека како самостојна и професионална организација ќе продолжат да даваат поддршка на реформските процеси.
„Лекарската комора, како самостојна и професионална организација на докторите по медицина, дава континуирана поддршка на позитивните промени креирани и имплементирани во инклузивен и транспарентен процес, со активна партиципација на докторите и сите засегнати страни. Тоа е предуслов за успешна реализација на новите проекти со заедничка цел – надградување на постоечкиот здравствен систем“, соопштија од Лекарската комора.
