Левица преку соопштение соопшти дека не се точни тврдењата на премиерот Христијан Мицкоски дека нивните предлози во Работната група за измените на Изборниот законик биле целосно прифатени. Од партијата велат дека нивните клучни барања – воведување една изборна единица и укинување на платеното политичко рекламирање – биле одбиени.
Според Левица, во текот на работата на групата тие настапувале конструктивно, со цел да се постигне консензус и да се имплементираат препораките на ОБСЕ/ОДИХР.
Од партијата посочуваат дека воведувањето една изборна единица било една од главните причини за формирањето на Работната група и нагласуваат дека тоа не е ново барање, туку иницијатива која со години се споменува во јавноста. Според нив, ова решение претходно било поддржувано и од ВМРО-ДПМНЕ, но во предложениот текст на новиот Изборен законик воопшто не е вклучено.
Левица смета дека наместо да се отвори дебата за една изборна единица, фокусот е пренасочен кон електронското гласање на дијаспората, прашање кое, како што наведуваат, не било дел од препораките на ОБСЕ/ОДИХР, ниту било причина за формирање на Работната група.
Во соопштението се тврди дека во предложениот текст на Изборниот законик се вградени решенија за кои не бил постигнат консензус, додека дел од претходно договорените предлози биле изоставени.
Од Левица оценуваат дека една изборна единица би обезбедила поправеден изборен натпревар и еднаква вредност на секој глас, а истовремено би го намалила, како што велат, изборниот инженеринг во корист на поголемите партии. Според нив, токму околу ова прашање треба да се води суштинската дебата за изборните реформи, а не околу електронското гласање на дијаспората.
