Левица преку соопштение реагира дека протестот на хирурзите во Струга, кои ги прекинаа планираните операции поради неисплатени надоместоци, отвора сериозни прашања за начинот на кој Министерството за здравство ја оценува „продуктивноста“ на здравствените работници.
Од партијата посочуваат дека лекарите тврдат оти не им се исплатени надоместоците што им следуваат согласно закон и колективен договор, додека министерот Арбен Алиу изнесува став дека токму установите кои најгласно ги бараат своите средства се меѓу најмалку продуктивните.
„Но, што всушност значи продуктивност во здравството?“, прашуваат од Левица, потсетувајќи дека и во минатото постоеле обиди за воведување систем на „плаќање по учинок“, кои наишле на силен отпор кај здравствените работници.
Според нив, прекувремената работа е јасно регулирана со Колективниот договор и надоместокот не зависи од субјективна проценка дали некој бил доволно продуктивен, туку од фактот дека работел повеќе од редовното работно време.
Во соопштението Левица тврди дека добива информации оти во повеќе здравствени установи се вршат кратења на надоместоците за прекувремена работа, што, според нив, укажува на сериозни финансиски проблеми во системот.
Во соопштението се потенцира дека најголемата цена од ваквите состојби ја плаќаат пациентите, особено оние чии операции и интервенции се одложуваат.
„Пациентите не смеат да бидат колатерална штета на недоразбирањата меѓу Министерството и здравствените работници. Должност на министерот е навремено да ги решава проблемите, а не да дозволи тие да ескалираат на штета на граѓаните“, наведуваат од партијата.
Оттаму повикуваат наместо политички квалификации да се понудат јасни критериуми и транспарентни податоци за тоа како се оценува ефикасноста на здравствените установи и вработените.
„Граѓаните и здравствените работници заслужуваат одговор на едно легитимно прашање – кога зборувате за продуктивност во здравството, што точно мерите и по кои правила?“, порачуваат од Левица.
