Левица преку соопштение обвини дека бегството на Александар Лазаров – „Цуната“, по кого Министерството за внатрешни работи распиша меѓународна потерница, претставува уште еден доказ за нефункционалноста на институциите и побара политичка одговорност.
Од партијата посочуваат дека станува збор за лице кое, според сведочења во судската постапка за трагедијата во дискотеката „Пулс“, било посочено како добро позната криминална фигура што продавала дрога во клубот.
Според Левица, судската постапка покажала дека „Пулс“ со години функционирал под институционална заштита, при што газдата и неговиот син однапред добивале информации за полициски и инспекциски контроли, а постојат сомнежи и за вмешаност на полициски службеници и други функционери.
„После ваквите сознанија, бегството на ‘Цуната’ не може да биде обичен пропуст“, велат од Левица.
Во соопштението партијата потсетува дека поднела интерпелација за министерот за внатрешни работи Панче Тошковски, наведувајќи системски пропусти, селективно постапување и недостиг од политичка одговорност, а го обвини ВМРО-ДПМНЕ дека застанало во негова одбрана.
„Ако човек чие име се споменува во судската постапка за „Пулс“ како добро познат наркодилер може да избега од полициска станица, тогаш има само две можни објаснувања – или МВР е целосно нефункционално, или криминалната мрежа што со години го штитеше ‘Пулс’ сè уште има свои луѓе во системот“, наведуваат од Левица.
Според партијата, наместо демонтажа на криминалната мрежа, бегството на „Цуната“ покажува дека институциите не можат или не сакаат да се пресметаат со криминалот.
