Од политичката партија Левица ги отфрлија тврдењата на премиерот Христијан Мицкоски за економските успеси на Владата, оценувајќи дека станува збор за статистички показатели кои, според нив, не ја отсликуваат реалната состојба со која се соочуваат граѓаните.
Од партијата наведуваат дека растот на бруто-домашниот производ не може да се смета за вистински економски успех во услови кога државата се задолжува со милијарди евра и кога јавната потрошувачка е значително зголемена.
„Реалната економија покажува пад на земјоделското и индустриското производство, зголемен увоз и намален извоз. Домашното производство слабее, а економијата сè повеќе се потпира на задолжување и јавна потрошувачка“, велат од Левица.
Според нив, номиналниот раст на БДП може да биде резултат на инфлација, поскапувања и задолжувања, но тоа не значи дека граѓаните имаат подобар животен стандард.
Од Левица посочуваат и дека потрошувачката кошничка е значително поскапена, додека платите не го следат растот на цените.
Партијата исто така забележува дека дел од економските показатели на кои се повикува Владата се базираат на проекциите на Меѓународниот монетарен фонд, за кои, според нив, нема гаранција дека ќе бидат реализирани.
„Граѓаните не живеат од статистички презентации, туку од можноста да ги платат сметките и да обезбедат пристоен живот. Огромен дел од населението не го чувствува растот со кој власта секојдневно се фали“, наведуваат од Левица.
