Левица: Има пари за НАТО, нема за студентите - ДПМНЕ крати 185 милиони од образованието

Опозициската партија Левица преку соопштение обвинува дека власта предводена од ДПМНЕ со ребалансот на буџетот ги намалила средствата за образование за 185 милиони денари, додека капиталните расходи на Министерството за образование и наука се намалуваат за дополнителни 518 милиони денари.

— реклама —

Од партијата оценуваат дека кратењата доаѓаат во период кога студентите тешко ги покриваат основните животни трошоци, студентскиот стандард се влошува, а износот на субвенционираниот студентски оброк со години не е усогласен со инфлацијата.

— реклама —

Според Левица, ваквата одлука е удар врз младите, кои наместо подобри услови за студирање и поквалитетно образование добиваат нови кратења. Партијата тврди дека власта се повикува на ограничениот буџет кога станува збор за зголемување на студентскиот оброк, но истовремено обезбедува средства за НАТО и воени расходи.

— реклама —

Од Левица обвинуваат дека владата продолжува да се задолжува и да штеди на различни категории граѓани, додека, како што наведуваат, ги штити интересите на најбогатите. Според партијата, намалувањето на средствата за образование ја загрозува иднината на државата.

Левица најави дека преку амандмани ќе се обиде да ги спречи кратењата со ребалансот на буџетот. Од партијата порачуваат дека средства има за младите, работниците и пензионерите, но дека недостига политичка волја, и бараат намалувањето на трошоците да започне од луксузот на функционерите.