Политичката партија Левица упати остри критики до министерот за здравство Сашо Клековски, обвинувајќи го дека, наместо да преземе одговорност за, како што велат, институционалните пропусти поврзани со состојбата во Гостивар, ги напаѓа лекарите и медицинската јавност.
Од Левица оценуваат дека, во време кога, според нив, Гостивар се соочува со сериозна здравствена состојба, министерот не понудил извинување ниту објаснување како институциите не го забележале проблемот навреме, туку, како што наведуваат, одлучил да ги обвинува докторите дека настапуваат поради „лајкови и кликови“.
Според партијата, Клековски неосновано ги критикува професорите, докторите и специјалистите кои, како што велат, имаат долгогодишно клиничко искуство, иако неговата професионална кариера, според нив, не е поврзана со долгогодишна работа во болнички установи.
Левица во соопштението ја критикува и одлуката за назначување на директорката на Институтот за јавно здравје, Марија Андоновска, наведувајќи дека институцијата ја раководи кадар со стоматолошко образование, додека, како што тврдат, власта ги напаѓа медицинските експерти кои јавно укажуваат на пропустите.
„Клековски не ја штити јавноста од нестручни совети, туку сопствената власт од стручни прашања на кои нема одговор“, наведуваат од Левица, оценувајќи дека, наместо да се слуша стручната јавност, се врши притисок врз докторите кои јавно ги изнесуваат своите ставови.
Од Министерството за здравство засега нема реакција на обвинувањата изнесени од Левица.
