Левица: Мицкоски им се извинува на САД затоа што македонски новинар прашал за безбедноста на државата

Левица со остра реакција го обвини премиерот Христијан Мицкоски дека, наместо да одговори на прашања за безбедносните импликации од користењето на македонските аеродроми од американски воени авиони, го нападнал новинарот кој го поставил прашањето и потоа им се извинил на „стратешките партнери“.

Од партијата посочуваат дека Мицкоски претходно, во интервју за американскиот „Брајтбарт“, зборувал за „отворено небо“ за американски воени авиони и за подготвеност Македонија да обезбедува поддршка за американските сили.

Според Левица, сосема легитимно е да се праша дали јавното изнесување на такви информации може да има безбедносни последици за државата.

— реклама —

„Наместо да одговори на прашањето, Мицкоски прибегна кон класичен политички спин: го нападна новинарот, неговото прашање го прогласи за ‘исклучително несмасно’ и ‘злонамерно’, а потоа го префрли разговорот на НАТО и на ‘стратешките партнери’“, наведуваат од Левица.

Од партијата тврдат дека суштината на прашањето не била членството во НАТО или стратешкото партнерство со САД, туку конкретно дали премиерот неодговорно изнесувал чувствителни информации за американски воени операции и дали со тоа може да ја загрози безбедноста на граѓаните.

Левица дополнително тврди дека Мицкоски создавал впечаток дека ваквата логистичка поддршка е автоматска обврска што произлегува од членството во НАТО.

— реклама —

Во соопштението се повикуваат на изјава на генералниот секретар на НАТО, Марк Руте, според која американско-израелската воена кампања против Иран не е операција на НАТО и дека користењето бази и друга логистичка поддршка е прашање на билатерални договори меѓу САД и одделни сојузници.

Од Левица затоа бараат Владата да објасни врз основа на кој договор, каква процедура и какво одобрение се користат македонските аеродроми.

Партијата дополнително го критикува начинот на кој Мицкоски ја поставува надворешната политика кон Вашингтон, тврдејќи дека премиерот не зборува само за стратешко партнерство со САД, туку отворено ја врзува Македонија за администрацијата на Доналд Трамп.

Според Левица, таквиот пристап е ризичен за мала држава.

— реклама —

„Стратешкото партнерство треба да биде институционално и долгорочно, а не лично врзување за еден политичар и една администрација“, оценуваат од партијата.

Најостар дел од реакцијата е посветен на извинувањето на Мицкоски до „стратешките партнери“.

„Мицкоски буквално се извини на странските партнери затоа што домашен новинар поставил прашање за можните безбедносни последици од неговите постапки“, наведуваат од Левица.

Од партијата порачуваат дека премиерот не треба да им се извинува на странските партнери затоа што медиумите поставуваат прашања, туку да даде отчет пред македонските граѓани за безбедносните и политичките последици од одлуките на Владата.

„Македонија може и треба да има сојузништва, но сојузништвото не значи вазалство, а стратешкото партнерство не значи откажување од сопствениот национален интерес и безбедност“, порачуваат од Левица.