Левица: По скандалот со Македониумот, Оџаклиески ја токми архиварката Стоиловска од ЗНАМ за директор на музејот во Крушево

Од партијата Левица преку соопштение отвораат нови прашања за кадровските решенија во НУ „Историски музеј“ – Крушево, по скандалот со издавањето на Македониумот за 500 евра за снимање музички спот и оставката на Миха Оџаклиески. Од партијата тврдат дека Даниела Стоиловска, која ја посочуваат како кадар на ЗНАМ, би можела да биде назначена за вршител на должноста директор на музејот.

— реклама —

Според информациите што ги изнесува Левица, Стоиловска била вработена во установата на работното место архивар, а по оставката на Оџаклиески се подготвувало нејзино назначување на раководната позиција. Засега, како што наведуваат од партијата, нема донесено решение за нејзино назначување, но прашуваат дали партиската припадност ќе биде пресудна при изборот на новиот раководител.

Од Левица посочуваат и на огласот за вработување број 409/2026 од 20 јуни годинава, во кој за работното место архивар биле предвидени образовни услови што вклучуваат средно образование. Според нив, потребно е да се разјасни врз основа на кои критериуми би се донело евентуалното решение за назначување на Стоиловска за в.д. директор.

— реклама —

Партијата изнесува и сомнежи поврзани со нејзините образовни квалификации, наведувајќи дека до нив пристигнала дојава оти Стоиловска наводно се обидувала да обезбеди диплома од Факултетот за туризам при Универзитетот „Скопје“ на Аце Миленковски, или дека можеби веќе поседува таква диплома. Од Левица бараат надлежните институции да ги проверат квалификациите и автентичноста на документацијата, нагласувајќи дека изнесените сомнежи треба да се утврдат врз основа на докази.

— реклама —

Во објавата се посочува и на состојбата со музеите и спомен-куќите во Крушево. Според Левица, Музејот на Илинден со години е затворен, леарницата не работи, а Музејот на НОВ е во лоша состојба и не е достапен за редовните посетители. Партијата наведува дека и други музејски поставки и спомен-куќи не функционираат соодветно, поради што туристите не можат секогаш да ги посетат при престојот во градот.

Од Левица додаваат дека за посета на дел од објектите е потребна претходна најава, а туристичките водичи мора однапред да договараат термини за организираните групи.

По случајот со Македониумот, партијата бара да се отвори прашањето за управувањето со музејското наследство во Крушево, причините поради кои дел од објектите се затворени или достапни само со најава, како и критериумите според кои се носат кадровските одлуки. Од Левица прашуваат дали, по оставката на Оџаклиески, навистина се подготвува назначување на неговата сопартијка Стоиловска и врз основа на кои услови би се донело таквото решение.