„Левица поднесе 47 амандмани кон ребалансот - парите да се насочат кај граѓаните, а не кај партиските интереси на власта“, велат од Левица

Преку соопштение, Левица информира дека пратеничката група на партијата поднела 47 амандмани на Предлог-ребалансот на Буџетот за 2026 година, со кои, како што наведува, бара суштинска прераспределба на буџетските средства кон области што директно влијаат врз животниот стандард на граѓаните.

Во соопштението се оценува дека предложениот ребаланс е финансиски неодговорен и дека наместо да ги коригира слабостите, дополнително ги продлабочува преку зголемен буџетски дефицит, нови задолжувања и ниска реализација на капиталните инвестиции.

— реклама —

Од Левица наведуваат дека нивните амандмани предвидуваат средствата да се пренасочат од, како што велат, непродуктивни расходи кон инвестиции во безбедноста, инфраструктурата, енергетиката, животната средина, земјоделството, домувањето, образованието, културата, спортот и социјалната заштита.

Според партијата, меѓу предложените мерки е и воведување ГПС-систем за службените возила, со цел да се обезбеди поголема контрола врз користењето на јавните ресурси.

— реклама —

Во соопштението се наведува дека Левица предлага дополнителни средства за противпожарна заштита, реконструкција и опремување на објекти на Министерството за внатрешни работи, инвестиции во Министерството за одбрана и Армијата, како и формирање центар за планинска безбедност.

— реклама —

Партијата предлага и повеќе средства за реализација на енергетски проекти, санација на депонии и хидројаловишта, заштита на шумите, изградба на канализациски системи и пречистителни станици, велосипедска инфраструктура, државни станови, фондови за млади, поддршка на земјоделството и отворање нови откупни центри.

Во делот на социјалната политика, Левица бара средства за национална СОС-линија за жртви на семејно насилство, центри за жртви на сексуално насилство, шелтер-центри и програми за заштита од ХИВ, додека во образованието и културата предлага поголеми вложувања во научноистражувачката дејност, спортската инфраструктура, Македонската радио-телевизија и националните установи од областа на културата.

— реклама —

Во соопштението се додава дека е предложено и отворање конзулат во Корча, како и поголема поддршка за македонските заедници во соседните држави.

Од Левица ја повикуваат власта да ги разгледа предложените амандмани, оценувајќи дека ребалансот на Буџетот треба да биде насочен кон јавниот интерес и потребите на граѓаните, а не кон, како што наведуваат, партиски интереси.