Левица прифати учество на трибината на „Платформата 12:05“, Мециновиќ објасни зошто

Пратеникот и портпарол на Левица, Амар Мециновиќ, денеска објасни зошто неговата партија прифати да учествува на настан организиран од „Платформата 12:05“, во која учествуваат актуелни и поранешни функционери на СДСМ.

Мециновиќ рече дека Левица, како опозициска партија, има обврска да разговара со различни опозициски и општествени чинители и да бара заеднички точки за политичко дејствување.

— реклама —

„Сметам дека за нас како Левица времето е созреано да продолжиме да разговараме со сите опозициски елементи во општеството, да се обидеме да пронајдеме заеднички јазик, затоа што сметаме дека сега е време да се направи рез“, рече Мециновиќ.

Тој додаде дека Левица сака да разговара и за иднината на државата, а не само за изминатите 35 години.

— реклама —

Мециновиќ истакна дека партијата има свои јасни политички и идеолошки позиции и дека разговорите со други опозициски сили не значат отстапување од нив.

— реклама —

Осврнувајќи се на можните реакции од СДСМ, тој рече дека Левица има одговорност пред граѓаните, а не пред СДСМ.

„Ние како Левица имаме одговорност пред граѓаните, а не пред СДСМ“, потенцираше Мециновиќ.

— реклама —

Тој оцени дека разговорите со „Платформата 12:05“ се дел од поширока комуникација со различни политички и општествени чинители, а не изолиран настан.

„Левица ќе продолжи да разговара со различни опозициски и независни општествени чинители, без отстапување од своите политички и идеолошки позиции, со цел да се отвори простор за организиран и суштински политички одговор на актуелната власт“, рече Мециновиќ.