Левица: Ристов ќе удри по џебот на најсиромашните – укинувањето на евтината тарифа ќе ги зголеми сметките

Левица преку соопштение реагираше на најавите на новиот претседател на Регулаторна комисија за енергетика, Ацо Ристов, за можни измени на тарифниот модел и евтината тарифа за електрична енергија, оценувајќи дека таквите потези директно ќе ги погодат најсиромашните граѓани.

— реклама —

Од партијата посочуваат дека Ристов во своето прво медиумско појавување најавил ревидирање на блоковите и евтината тарифа во сметките за струја, со што, според нив, покажал дека електричната енергија ја третира како роба која треба да има единечна цена.

„Доколку РКЕ донесе ваква скандалозна одлука тогаш директно ќе удри по најсиромашните. Пресметките покажуваат дека едно семејство кое штеди електрична енергија и останува во првиот тарифен блок, на годишно ниво ќе плаќа за третина поскапа струја“, велат од Левица.

— реклама —

Партијата обвинува дека Ристов се ставил „во функција на приватниот капитал“ и на страната на ЕВН, посочувајќи дека ЕВН Хоум е универзален снабдувач за домаќинствата.

— реклама —

Во соопштението се наведува и дека претседателот на РКЕ не се осврнал на, како што велат, паушалните сметки што ЕВН ги доставува без отчитување на броилата, ниту на можноста за проширување на времетраењето на евтината тарифа.

Од Левица сметаат дека тарифните блокови треба да останат, а евтината тарифа да се прошири. Како решение за пониска цена на струјата, тие предлагаат ЕЛЕМ Продажба законски да стане универзален снабдувач, со значително пониска маржа од сегашната на ЕВН Хоум.

— реклама —

Партијата предлага и воведување повеќетарифен систем со зимски и летен режим, повеќе часовни блокови и т.н. „сончева тарифа“, која би овозможила подобро усогласување на производството и потрошувачката на електрична енергија.