Советничката група на Левица во Советот на Општина Прилеп соопшти дека, по нивна иницијатива и притисок од синдикалните претставници, вработените во детската градинка ,,Наша Иднина“ во Прилеп од мај ќе добиваат повисоки плати по основ на додаток за работа во групи со зголемен број на деца.
Како што информираат од Левица, уште во март тие предложиле донесување на одлуки и правилник согласно Колективниот договор за јавни установи за деца, со кои ќе се овозможи исплата на додаток на плата за воспитувачките и негувателките кои работат со број на деца над утврдениот норматив.
По ова Независниот синдикат за образование и наука покренал постапка пред раководството на установата за остварување на ова право, со укажување дека доколку не се донесат таквите одлуки ќе биде побарана одговорност за кршење на правата од работен однос пред Основното јавно обвинителство Прилеп.
„После неколкукратна преписка, Управниот одбор на ЈОУДГ,,Наша Иднина“ – Прилеп, на 29 април донесе одлука и правилник со кои се уредува начинот, критериумите, висината и постапката за исплата на додаток на плата за работа во група со зголем број на деца“, велат од Левица.
Според усвоениот правилник, додатокот ќе се пресметува на дневна основа во бодови, така што разликата меѓу нормативниот број на деца и реалниот број на деца ќе се множи со еден бод по дете. Вкупниот месечен додаток ќе се пресметува како збир од дневните додатоци на плата.
Од партијата посочуваат дека вредноста на бодот за 2026 година изнесува 81,6 денари, а со оглед дека групите во градинките често работат со зголемен број на деца воспитувачките и негувателките ќе остваруваат во просек по 10 до 12 илјади денари повисока плата месечно.
Од Левица најавуваат дека ќе продолжат со, како што велат, институционалната битка за остварување на колективните права на вработените и во другите локални институции.
