Левица: Струјата е „евтина“ само на хартија, но најмногу тежи на џебот на народот - Левица бара реформа на тарифниот систем

Политичката партија Левица преку соопштение бара промени во тарифниот систем за електричната енергија, оценувајќи дека номинално ниската цена на струјата не значи и низок трошок за граѓаните.

Од партијата се повикуваат на податоци на ЕУРОСТАТ за втората половина од 2025 година, според кои, кога цената на електричната енергија се споредува со куповната моќ на населението, Македонија има највисок трошок меѓу земјите од Западен Балкан.

— реклама —

Од Левица објаснуваат дека номиналната цена сама по себе не го покажува реалниот товар врз домашниот буџет. За таа цел ЕУРОСТАТ го користи PPS – стандардот на куповна моќ, кој овозможува споредување на реалниот ценовен товар меѓу државите, земајќи ги предвид разликите во ценовното ниво и куповната моќ.

„Евтина“ цена, според партијата, не значи автоматски и евтина електрична енергија за работниците, пензионерите и семејствата со просечни приходи. Од Левица посочуваат дека во услови на ниски приходи и зголемени трошоци за живот, секое поскапување на основните енергетски потреби директно влијае врз животниот стандард.

— реклама —

Од партијата исто така ја критикуваат досегашната работа на Регулаторната комисија за енергетика, наведувајќи дека честото менување на правилниците и тарифните модели го зголемува товарот врз граѓаните.

— реклама —

Левица предлага да се задржат тарифните блокови, но да се продолжи временскиот период во кој важи евтината тарифа, со цел таа да биде достапна за поголем број домаќинства.

Како структурно решение за намалување на цената, од партијата бараат ЕЛЕМ Продажба да биде законски определен како универзален снабдувач, со маржа двојно помала од сегашната маржа на ЕВН Хоум од 9,9 проценти.

Дополнително, Левица бара воведување повеќетарифен систем со зимски и летен период и повеќе часовни блокови, како и воведување сончева тарифа со која би се усогласиле производството и потрошувачката, би се искористиле вишоците од сончевата енергија и би се намалиле сметките за електрична енергија.

Од партијата бараат и продолжување на периодот за користење евтина тарифа, со став дека енергетскиот сектор треба да биде насочен кон обезбедување достапна електрична енергија и заштита на животниот стандард на граѓаните.