Македонско-чешките односи и можностите за нивно продлабочување беа во фокусот на средбата во Охрид меѓу министерот за надворешни работи и надворешна трговија Тимчо Муцунски и заменик-претседателот на Владата и министер за надворешни работи на Чешка, Петр Мацинка.
На средбата беше потврдена чешката поддршка за европската интеграција на Македонија, како и зајакнувањето на политичкото и економското партнерство меѓу двете земји. Муцунски оцени дека постои значителен простор за зголемување на трговската размена и привлекување нови чешки инвестиции.
Како области со најголем потенцијал беа издвоени транспортот и инфраструктурата, енергетиката, туризмот, земјоделството и технолошките инвестиции. Чешка во моментов е меѓу 15-те најзначајни трговски партнери на Македонија.
Разговорите ги опфатија и регионалните, европските и глобалните безбедносни прашања. Како сојузници во НАТО, двете страни ја нагласија потребата од натамошна координација и соработка за зачувување на мирот и стабилноста во Европа и регионот.
Посебен акцент беше ставен на европската перспектива на Македонија. Муцунски се заблагодари за континуираната поддршка од Чешка, додека Мацинка потврди дека неговата земја останува поддржувач на проширувањето на Европската Унија.
„Европската интеграција останува стратешка определба. Подготвени сме да ги спроведуваме реформите и да ги исполнуваме европските стандарди, но процесот мора да биде кредибилен и предвидлив“, истакна Муцунски.
Посетата има и значајна економска димензија. Во чешката делегација се вклучени претставници на повеќе компании, кои ќе остварат контакти со македонски компании со цел воспоставување нови B2B-партнерства и унапредување на трговската соработка.
