Три реактори во нуклеарната централа Гравлин во северна Франција биле исклучени откако рој медузи ги блокирал пумпите за ладење со морска вода, соопшти енергетската компанија ЕДФ.
Инцидентот се случил во понеделникот, при што три реактори биле целосно исклучени, додека моќноста на четвртиот била намалена за половина. Петтиот реактор продолжува да работи со полн капацитет, а шестиот бил исклучен и претходно поради редовно одржување.
Од ЕДФ соопштија дека ситуацијата не претставува опасност за безбедноста на постројката, вработените или животната средина.
Гравлин е најголемата нуклеарна централа во западна Европа и располага со шест реактори, секој со моќност од 900 мегавати. Сличен проблем со медузи се случил и минатата година, кога биле блокирани пумпните станици за морска вода.
Нуклеарното производство во Франција годинава веќе неколкупати било намалено поради топлотни бранови и суша, а високите температури во јуни и јули довеле до привремено запирање на работата на неколку реактори.
Експертите посочуваат дека прекумерниот риболов, загадувањето со пластика и затоплувањето на морето создаваат услови за зголемено размножување на медузите.
