Поранешниот вицепремиер задолжен за добро владеење, Арбен Фетаи, ќе биде именуван за специјален владин претставник во Брисел, најави денеска еден од лидерите на коалицијата Вреди и градоначалник на Чаир, Изет Меџити.
Одговарајќи на новинарски прашања, Меџити рече дека оставката на Фетаи од вицепремиерската функција е поврзана со неговото ново ангажирање.
„Фетаи даде оставка за да биде назначен за специјален претставник во Брисел, односно да заземе нова функција“, изјави Меџити.
Фетаи пред неколку дена поднесе оставка од функцијата вицепремиер за добро владеење. Неговото заминување следува откако повеќе од два месеца не присуствуваше на владините седници, а во јавноста беа објавени и фотографии од негов престој во Тајланд.
Во писмото со оставката упатено до премиерот, Фетаи се заблагодари за довербата што му била укажана за извршување на функцијата, но наведе дека во актуелните околности повеќе не постојат услови таа да ја врши со потребната ефикасност.
„Замнувам со крената глава и чиста совест“, напиша Фетаи во образложението на својата оставка, без дополнително да ги појасни причините за ваквата одлука.
Засега не се соопштени повеќе детали околу новата функција што треба да ја преземе во Брисел.
