Германскиот канцелар Фридрих Мерц побара намалување на предложениот долгорочен буџет на Европската Унија за периодот од 2028 до 2034 година, оценувајќи дека сегашниот предлог е преголем и финансиски неодржлив.
Говорејќи во Брисел на маргините на консултациите со европските лидери, Мерц изјави дека е потребен нов предлог со пониски износи.
„Предлогот што е на маса е превисок. Бројките треба да се намалат“, порача германскиот канцелар.
Неговата реакција доаѓа во време кога Европската Унија се обидува да го усогласи следниот повеќегодишен финансиски план, кој треба да ги покрие традиционалните расходи, како што се земјоделските субвенции и поддршката за помалку развиените региони, но и новите приоритети поврзани со конкурентноста, одбраната и стратешките инвестиции.
Според актуелниот компромисен предлог, буџетот би бил намален за два процента во однос на првичниот предлог на Европската комисија, кој изнесува 1,76 трилиони евра.
Европската Унија се соочува со зголемени финансиски потреби, додека многу земји-членки се под притисок на сопствените јавни финансии по неколку години економски и геополитички кризи.
Мерц истакна и дека ЕУ не треба да презема нов заеднички долг, додавајќи дека европските лидери треба да разговараат и за идните извори на приходи на Унијата.
Во меѓувреме, Европскиот парламент веќе предложи воведување нови извори на приходи, меѓу кои данок на дигитални услуги, оданочување на онлајн коцкањето и трансакциите со крипто-средства, како и продолжување на механизмот за јаглеродна такса на границите на ЕУ.
Богатите земји-членки, меѓу кои и Германија, кои издвојуваат најголем дел од средствата во заедничкиот европски буџет, во изминатиот период повеќепати побараа негово значително намалување.
