Мицкоски: ДЗС ги објави конечните бројки: растот на БДП е во нагорна линија од 3,8%, тоа е повторно лоша вест за опозицијата

Премиерот Христијан Мицкоски оцени дека економските показатели во Македонија се движат во позитивна насока, откако Државниот завод за статистика ги објави конечните податоци за растот на БДП во 2024 година и ревидираните бројки за 2025 година. Според нив, растот во двете години изнесува 3,8 отсто.

— реклама —

Одговарајќи на новинарско прашање за индустриското производство и економските показатели, Мицкоски посочи дека растот за 2024 година е ревидиран од 3 на 3,8 отсто, додека за 2025 година од 3,5 на 3,8 отсто.

— реклама —

Тој истакна дека Владата веќе ја остварила првично поставената цел номиналниот бруто-домашен производ да достигне 20 милијарди долари до крајот на мандатот. Според Мицкоски, оваа цел била достигната уште во 2025 година, поради што Владата сега има нова амбиција – економијата да достигне вредност од 22 милијарди долари.

Премиерот како охрабрувачки го оцени и податокот за индустриското производство, кое во септември пораснало за 2,4 отсто. Тој нагласи дека растот е остварен во услови на глобални геополитички тензии, неизвесност на енергетските пазари и намалена побарувачка поврзана со Европската Унија, која е најголемиот трговски партнер на Македонија.

— реклама —

„Не можам да кажам дека сум незадоволен. Задоволен сум. Секогаш може и подобро и одиме подобро“, изјави Мицкоски, оценувајќи дека резултатите се меѓу најдобрите во регионот и Европа.

Тој упати и критики кон опозицијата, оценувајќи дека позитивните економски показатели се лоша вест за неа, бидејќи, според неговите зборови, би сакала земјата да продолжи да се соочува со економските и политичките проблеми од претходниот период.