Мицкоски: Ние сме единствената држава што води проактивни политики и презема навремени мерки, затоа сме со најниска инфлација и највисок раст на БДП

Премиерот Христијан Мицкоски оцени дека Македонија полесно се справува со актуелната економска криза отколку во претходните години, наведувајќи дека инфлацијата во септември изнесувала 2,7 отсто, а бројот на вработени достигнал 708 илјади.

Во гостувањето во „Само интервју“ на телевизијата „Канал 5“, Мицкоски рече дека економските политики треба да се оценуваат преку споредба на резултатите на владите, а не само преку цените на производите и горивата. Според него, важно е колку граѓаните можат да купат со своите примања и како државата реагира во услови на криза.

— реклама —

Тој посочи дека инфлацијата во Македонија во септември била 2,7 отсто, наспроти просечните 3,8 отсто во Европската Унија. За споредба, во септември 2022 година, според податоците што ги наведе, инфлацијата во земјата изнесувала 18,7 отсто.

— реклама —

Мицкоски објасни дека пониските цени на горивата се резултат и на намалувањето на данокот на додадена вредност. Како што рече, дизелот чини 99 денари за литар, а безоловниот бензин 91 денар. Тој потсети дека ДДВ-то за горивата било намалено од 18 на 10 отсто во првиот бран на кризата, а потоа и во вториот.

Премиерот нагласи дека не се решени сите проблеми и дека животниот стандард во Македонија сè уште не е подобар од оној во Германија, но оцени дека граѓаните денес живеат подобро отколку пред три години.

— реклама —

Како дополнителни показатели, тој го посочи Џини-индексот, за кој рече дека изнесува 29,2, исто колку и европскиот просек, како и растот на вработеноста. Според бројките што ги наведе, бројот на вработени се зголемил од 691 илјада на 708 илјади, односно за 17 илјади.

Мицкоски направи и споредба на растот на јавниот долг и бруто-домашниот производ во различни периоди, тврдејќи дека во периодот од 2018 до 2023 година растот на долгот речиси се изедначил со растот на БДП, додека во периодот од 2025 до 2026 година очекува растот на БДП да биде значително поголем од зголемувањето на долгот.

„Ова се бројки и податоци“, заклучи Мицкоски.