Мицкоски: Ги браниме државните интереси и прилично успешно се справуваме со енергетската криза

Премиерот Христијан Мицкоски оцени дека Македонија денес е подобро место за живеење отколку пред три или четири години, посочувајќи дека Владата ги брани државните интереси, се справува со енергетската криза и презема мерки за сузбивање на криминалот. Сепак, тој призна дека се потребни уште поодлучни активности.

— реклама —

Во гостувањето во „Само интервју“ на телевизија „Канал 5“, Мицкоски рече дека во досегашното работење на Владата, која е избрана пред околу 28 месеци, нема афера поврзана со неа. Тој оцени дека земјата се соочува со сложени околности поради енергетската криза и потресите на финансиските пазари, кои, според него, предизвикале и социјални немири во дел од европските метрополи.

— реклама —

Премиерот истакна дека Владата работи и на подобрување на безбедноста, наведувајќи дека полициските акции придонеле за сузбивање на криминалот во повеќе области. Според него, граѓаните денес можат послободно да се движат низ Скопје и другите градови во Македонија.

— реклама —

„Дали е тоа доволно? Не. Дали треба да биде уште поробустно сето тоа? Да, се согласувам дека треба да биде. Но, дали е подобро од пред три или четири години, кога разноразни мафии и банди царуваа низ Скопје? Е, многу подобро“, изјави Мицкоски.

Тој додаде дека Владата се однесува дисциплинирано и дека ќе продолжи да работи на тоа Македонија да биде побезбедна за граѓаните.