Мицкоски: Јас сум за отворање рудник за антимон во Крстов Дол, ист став има и вашиот градоначалник на Крива Паланка

Премиерот Христијан Мицкоски изјави дека го поддржува отворањето рудник за антимон во селото Луке, во општина Крива Паланка, додавајќи дека ист став има и градоначалникот на општината од редовите на СДСМ. Ова го истакна на денешната собраниска седница за пратенички прашања.

— реклама —

„За рудникот за антимон во Крива Паланка, во местото Луке, да, сум за, исто како и вашиот градоначалник. И тој застана во насока на поддршка на рудникот во Луке, во Крстов Дол“, рече Мицкоски, обвинувајќи ја опозицијата дека има поинаков став од градоначалникот.

— реклама —

Осврнувајќи се на рудникот „Казандол“, премиерот рече дека арбитражниот спор произлегол од одлуката на претходната влада да го раскине договорот. Според него, актуелната влада го добила спорот, а украинската компанија што ја покренала постапката треба да ги покрие трошоците за арбитражата, без финансиски последици за државата.

Мицкоски изнесе и тврдења за наводни обиди на претходната влада да постигне спогодба во спорот за сума од 20 до 30 милиони долари, но нагласи дека тоа се наводи што ги слушнал во текот на постапката.

— реклама —

Говорејќи за проектот „Штука – Иловица“, премиерот потсети дека започнал во времето на владата предводена од Владо Бучковски, а подоцна продолжил со одлуки на владата на СДСМ и ДУИ за спојување на двете концесиски подрачја. Тој рече дека Вишиот управен суд ја поништил подоцнежната одлука со која било поништено нивното спојување.

Мицкоски оцени дека претходната власт донесувала одлуки на штета на државните интереси и порача дека неговата влада нема да презема чекори спротивни на интересите на граѓаните.