Мицкоски очекува инфлација од 1,5 до 2% кај храната во септември: „Утре ќе видиме колку ќе биде вкупната“

Премиерот Христијан Мицкоски очекува годишната инфлација кај храната и безалкохолните пијалоци во септември да се движи меѓу 1,5 и 2 проценти, повикувајќи се на анализите на Државниот пазарен инспекторат. Официјалните податоци за вкупната инфлација треба да ги објави Државниот завод за статистика.

„Јас очекувам, според нашите анализи што ги прави Државниот пазарен инспекторат, барем кај храната и безалкохолните пијалоци, во септември да се движиме меѓу 1,5 и 2% инфлација на годишно ниво. Утре треба да ја објави Државниот завод за статистика, ќе видиме колку ќе биде вкупната инфлација“, рече Мицкоски.

Тој ги спореди движењата во Македонија со оние во еврозоната, посочувајќи дека домашната годишна инфлација во јули изнесувала 2,3%, а во август 2,6%. Евростат регистрираше 2,9% инфлација во еврозоната во јули и 3,2% во август, додека прелиминарната проценка за септември е 3,8%.

— реклама —

Мицкоски се осврна и на економскиот раст, посочувајќи дека БДП во вториот квартал пораснал за 4,3% на годишно ниво.

Според премиерот, во периодот откако актуелната Влада е избрана просечниот реален економски раст е над 3,5%, што тој го спореди со значително понискиот раст кај најголемите трговски партнери на земјата.

— реклама —

„Да, ние ќе се вратиме на 2006-2008 година, сме имале 5, 5,5, па дури и 6%, но тогаш растот насекаде беше толкав. Сега зборуваме за раст трипати поголем просечно, споредено со просечниот раст кај нашиот најголем трговски партнер“, рече Мицкоски.

Како дополнителен показател за движењето на економијата, тој ги посочи податоците за надворешната трговија во јули и август, наведувајќи раст на извозот од 11,5%, наспроти раст на увозот од 8,5%.

Според Мицкоски, фактот што извозот расте со повисока стапка од увозот е позитивен сигнал, иако Македонија останува увозно зависна економија.

— реклама —

Премиерот оцени дека овие резултати се постигнуваат во услови на војни, енергетска криза и нестабилност на меѓународните пазари.

Тој посочи и на неодамнешните проблеми со снабдувањето со дизел во дел од земјите од Г7 и можноста за ограничувања на извозот, оценувајќи дека Македонија успеала да обезбеди стабилно снабдување и ниски цени на горивата.

Според него, ваквата состојба придонела и за стабилизирање на инфлацијата во земјата.

„Нас нè убедуваат дека е увезена инфлацијата, не можело да не биде увезена инфлацијата“, рече Мицкоски, посочувајќи на разликата меѓу домашните стапки и оние во еврозоната.

Официјалната статистика за септемвриската инфлација треба да покаже дали очекувањата на Владата за натамошно смирување на ценовните притисоци ќе се потврдат.