Премиерот Христијан Мицкоски во Њујорк оствари повеќе билатерални средби со високи европски и регионални претставници, на кои главни теми биле европската интеграција на Македонија, безбедноста, регионалната соработка и актуелните глобални предизвици.
Во рамки на посетата, Мицкоски се сретна со претседателот на Финска, Александар Стуб. На средбата било разговарано за значењето на мирот, дијалогот и одговорното лидерство, како и за почитувањето на меѓународното право и зајакнувањето на мултилатералната соработка. Била нагласена и потребата од заеднички напори за стабилна и безбедна Европа.
Со премиерот на Косово, Албин Курти, во фокусот биле добрососедските односи, продлабочувањето на регионалната соработка, како и заедничките предизвици и можности за развој на двете држави.
Мицкоски остварил средба и со хрватскиот премиер Андреј Пленковиќ, на која биле разменети мислења за европската перспектива на Македонија, продолжувањето на реформите согласно европските стандарди, унапредувањето на добрососедските односи и зајакнувањето на регионалната соработка.
На средбата со високата претставничка на Европската Унија за надворешни работи и безбедносна политика, Каја Калас, биле разгледани актуелните регионални предизвици, можностите за понатамошно зајакнување на соработката и заедничките приоритети за стабилен и безбеден регион.
Од Владата посочуваат дека средбите во Њујорк ја потврдуваат определбата на Македонија за активна и конструктивна улога во меѓународната заедница, како и за зајакнување на партнерствата со европските и регионалните партнери.
Во фокусот остануваат реформите, европската интеграција, добрососедските односи и придонесот кон стабилен, безбеден и просперитетен регион.
