Шпанскиот министер за надворешни работи, Европската Унија и соработка, Хозе Мануел Албарес, соопшти дека го повикал италијанскиот амбасадор на разговор по изјавите на неговиот италијански колега Антонио Тајани, кој побара суспензија на Шенгенскиот договор со Шпанија поради мигрантската криза во Сеута.
Албарес оцени дека ваквите пораки не се соодветни за министер за надворешни работи на пријателска и партнерска земја.
„Од Италија очекуваме европска солидарност, а не страначка демагогија. Денешните настани се поврзани со судска пресуда и немаат никаква врска со она што е наведено во објавата“, напиша Албарес на социјалната мрежа Икс, најавувајќи дека италијанскиот амбасадор ќе биде повикан на разговор.
Претходно, Тајани изјави дека одлуката на шпанската Влада да им додели шпанско, а со тоа и европско државјанство на повеќе од 500.000 нелегални мигранти е сериозна грешка, која, според него, дополнително ја поттикнува трговијата со луѓе.
Во меѓувреме, извори од кабинетот на италијанската премиерка Џорџа Мелони за Ројтерс изјавиле дека Владата на Италија ја разгледува можноста за суспендирање на Шенгенскиот договор со Шпанија.
Во текот на вчерашниот ден илјадници мигранти се обидоа да ја преминат морската граница меѓу Мароко и шпанската енклава Сеута, поради што шпанските власти распоредија армиски сили како поддршка на преоптоварената Цивилна гарда.
Според првичните информации, најмалку 18 лица се удавиле обидувајќи се да стигнат до брегот на Сеута, во близина на граничниот премин Тарахал.
Шпанскиот премиер Педро Санчез денеска треба да ја посети Сеута, придружуван од министерот за внатрешни работи Фернандо Гранде-Марласка.
