По повод Светскиот ден на срцето – 29 септември, министерот за здравство Сашо Клековски го посети пунктот за бесплатни прегледи, организиран од Институтот за јавно здравје во трговскиот центар „Дајмонд мол“.
Активноста е насочена кон подигнување на свесноста кај граѓаните за превенција и навремено откривање на кардиоваскуларните заболувања.
Годинава Светскиот ден на срцето се одбележува под слоганот „Болеста на срцето може да биде незабележлива: Фати го ритамот на срцето! Не пропуштај ниту едно отчукување!“. Фокусот е ставен на препознавање на скриените симптоми, едукација на населението и обезбедување пристап до кардиолошка нега и превентивни прегледи.
На пунктот на ИЈЗ, граѓаните имаа можност бесплатно да го проверат крвниот притисок, шеќерот во крвта и холестеролот, како и висината и телесната тежина. Со овие мерења се овозможува и пресметување на индексот на телесна маса (BMI), кој е еден од показателите за ризик од срцеви заболувања.
„Смртноста од кардиоваскуларни заболувања е еден од најголемите ризици во светот. Факторите кои ги предизвикуваат овие заболувања може да се превенираат и да се откријат со едноставни прегледи. Апелирам граѓаните редовно да контролираат крвен притисок, гликемија и, доколку има потреба, да земаат терапија пропишана од доктор. Само на тој начин ќе го заштитиме здравјето“, посочи министерот Клековски.
