Министерството за економија: Нема потреба од нови мерки, храната втор месец по ред поевтинува

Министерството за економија и труд оценува дека во моментов нема потреба од воведување нови мерки за ограничување на цените на храната, откако Државниот завод за статистика објави дека годишната инфлација во јули изнесува 2,3 проценти, а на месечно ниво 0,1 процент.

— реклама —

Од Министерството посочуваат дека официјалните показатели укажуваат на стабилни ценовни движења, а кај храната втор месец по ред е регистрирано намалување на цените.

— реклама —

„Во моментов, официјалните показатели не упатуваат на потреба од воведување нови интервентни мерки, бидејќи ценовните движења се стабилни, а кај најзначајната категорија – храната – веќе втор месец по ред се бележи намалување на цените“, соопштија од Министерството.

— реклама —

Според ресорот, растот на трошоците за живот во јули главно се должи на сезонски фактори, пред сè во транспортот, каде е забележан раст од 4,4 проценти, како и кај рекреацијата, спортот и културата. Од Министерството додаваат дека состојбата внимателно се следи и дека, доколку се појават неоправдани ценовни шокови или нарушувања на пазарот, ќе бидат преземени соодветни мерки.

Министерката за финансии, Гордана Димитриеска-Кочоска, оцени дека продолжувањето на трендот на намалување на инфлацијата е охрабрувачки сигнал за економијата, посочувајќи дека раст бележат и извозот, индустриското производство, вработеноста и даночните приходи во Буџетот.