Од Левица преку соопштение велат дека воведувањето една изборна единица претставува клучна демократска реформа и оценуваат дека актуелниот изборен модел не ја отсликува реалната волја на граѓаните.
Реакцијата следува откако ВМРО-ДПМНЕ соопшти дека ќе го прифати договорот на опозициските партии за измените на Изборниот законик, доколку биде прифатен нивниот предлог за гласање на дијаспората по пошта.
Од Левица посочуваат дека сегашниот модел со шест изборни единици создава нееднаква политичка застапеност, бидејќи, според нив, голем број гласови не се претвораат во пратенички мандати.
„Партија може да добие значителна поддршка на национално ниво, но да остане без пратеник затоа што гласовите се распределени во шест различни изборни единици. Со една изборна единица тие гласови би се собирале и би се претворале во мандати многу пореално“, наведуваат од партијата.
Според Левица, актуелниот систем им дава предност на поголемите политички партии и го одржува бипартизмот, додека помалите партии остануваат без соодветна застапеност и покрај добиената поддршка.
Во соопштението се наведува и дека вредноста на гласот не е еднаква во сите изборни единици, посочувајќи дека за избор на еден пратеник во различни изборни единици се потребни различен број гласови.
Од Левица ги повикуваат сите опозициски партии да покажат политичка зрелост и да ја поддржат идејата за воведување една изборна единица, оценувајќи дека тоа е единствената суштинска реформа што ќе обезбеди поправедна и попропорционална застапеност на граѓаните во Собранието.
