Муцунски на Бледскиот стратешки форум: Европската интеграција треба да ги трансформира институциите, а не идентитетите

Министерот за надворешни работи и надворешна трговија, Тимчо Муцунски, порача дека европската интеграција треба да придонесе за трансформација и зајакнување на институциите, но не и за промена на идентитетите.

Муцунски учествуваше на министерската сесија посветена на геополитичките предизвици во Централна и Југоисточна Европа, во рамки на Бледскиот стратешки форум.

— реклама —

Во обраќањето тој се осврна на безбедносните ризици во регионот, значењето на транспортните коридори и европската перспектива на Западен Балкан. Посочи дека членството во НАТО носи значајни придобивки, но предупреди дека регионот и натаму се соочува со различни безбедносни закани, вклучително и сајбер-влијанија и економски притисоци.

— реклама —

Посебно внимание посвети на Коридорите VIII и X, нагласувајќи дека Северна Македонија е единствената земја во регионот низ која се вкрстуваат двата коридора.

„Нашата отпорност е силна онолку колку што е силна нашата инфраструктура“, порача Муцунски.

— реклама —

Тој нагласи дека инвестициите во инфраструктурата и регионалната поврзаност мора да бидат проследени со јасна политичка поддршка за проширувањето на Европската Унија. Според него, напредокот на земјите кандидати и нивната усогласеност со заедничката надворешна и безбедносна политика на ЕУ треба да бидат видливи и соодветно вреднувани.

„Нашето барање е јасно – европската интеграција да биде модел за трансформација на нашите институции, а не обид за трансформација на нашите идентитети. Оценувајте нè врз основа на заслугите“, истакна Муцунски.

Тој како позитивен пример за регионална соработка ги посочи Словенија и Хрватска, оценувајќи дека нивните денешни односи покажуваат дека и по сложени периоди може да се изгради силна соработка и стратешка отпорност.