Министерот за надворешни работи и надворешна трговија Тимчо Муцунски, во интервју за „Брисел Плејбук“ на „Политико“, изјави дека Македонија заслужува праведен, предвидлив и кредибилен пат кон полноправно членство во Европската Унија, оценувајќи дека земјата предолго е изложена на политички блокади.
Во текстот се потсетува дека Македонија има статус на кандидат за членство од 2005 година и е целосно усогласена со надворешната политика на ЕУ, но и по две децении сè уште не ги започнала суштинските пристапни преговори.
„Да, понекогаш сме многу фрустрирани поради недостигот од политички резултати“, изјави Муцунски, додавајќи дека Македонија станала „студија на случај“ за тоа како билатералните спорови можат да го попречат процесот на проширување на Унијата.
Осврнувајќи се на напредокот на другите земји кандидати, „Политико“ наведува дека Црна Гора забрзано напредува кон членство, Албанија веќе затворила неколку преговарачки поглавја, а Украина и Молдавија ги движат преговорите напред, додека Македонија повеќе од 20 години нема затворено ниту едно поглавје.
„Да се каже дека кон нас се постапувало неправедно е преблага формулација“, нагласи Муцунски.
Во интервјуто се потсетува дека Македонија го промени знамето во 1995 година, а уставното име во 2019 година, по што евроинтегративниот процес беше блокиран поради барањето на Бугарија за внесување на Бугарите во Уставот.
Според Муцунски, идејата за уставни измени станала политички чувствителна поради бројните отстапки што земјата ги направила во минатото, а граѓаните повеќе не веруваат дека со исполнување на сегашните барања нема да следуваат нови услови.
„Ова е апсолутна злоупотреба на позицијата на една земја членка на Европската Унија“, рече министерот.
Тој оцени дека и Бугарија би имала значителна корист од напредокот на Македонија кон членство во Унијата и додаде дека, и покрај сите предизвици, државата нема алтернатива на европскиот пат.
„Нашата земја го нема луксузот да има алтернатива Б или алтернатива В“, порача Муцунски.
