Најмалку 40 лица се удавија во Франција обидувајќи се да се разладат од екстремните горештини

Најмалку 40 лица се удавиле во Франција во изминатите денови, обидувајќи се да се разладат и да побегнат од рекордните горештини што ја зафатија земјата, соопшти францускиот премиер Себастијан Лекорну.

Франција, заедно со Велика Британија, Италија, Шпанија и Белгија, се соочува со интензивен топлотен бран, кој предизвика сериозни нарушувања во секојдневниот живот, вклучително и затворање училишта и проблеми во сообраќајот.

— реклама —

Според Светската метеоролошка организација, Европа се затоплува повеќе од двојно побрзо од глобалниот просек, што ги прави ваквите екстремни временски појави сè почести.

Голем дел од Франција е под предупредување за екстремни горештини, а метеоролозите најавуваат температури до 40 степени Целзиусови, додека во некои делови од западна Франција се очекуваат и до 43 степени.

— реклама —

„Трагичен е бројот на удавени лица. Најновите податоци покажуваат 40 смртни случаи од 18 јуни, а најголем дел од жртвите се млади луѓе“, изјави Лекорну пред итниот состанок посветен на топлотниот бран.

Франција неодамна ги регистрираше најтоплите попладниња и ноќи од почетокот на мерењата во 1947 година, а дури 54 департмани се ставени под црвено предупредување.

— реклама —

Топлотниот бран, предизвикан од временскиот феномен познат како „Омега блок“, ги погоди и другите европски земји. Во Италија е издадено највисоко ниво на предупредување за 15 градови, додека во Шпанија температурите достигнаа над 45 степени Целзиусови.

Во Велика Британија, метеоролозите предупредуваат дека температурите во јужна Англија би можеле да достигнат 37 степени, а десетици училишта најавија порано завршување на наставата поради неподносливите услови во училниците.

Поради екстремните температури, транспортните мрежи низ Европа се соочуваат со сериозни предизвици, а во некои делови од Франција и Велика Британија веќе се регистрирани откажувања и доцнења во железничкиот и воздушниот сообраќај.