„Наместо укинување на онлајн коцкањето - владиниот закон спрема приватизација на онлајн бизнисот со коцка“, велат од Левица

Левица преку соопштение обвини дека новиот предлог-закон за игри на среќа, наместо да го укине онлајн коцкањето, отвора простор за влез на нови приватни интереси во овој бизнис.

— реклама —

Од партијата велат дека власта и коалицијата ВРЕДИ пред изборите ветувале ограничување и укинување на онлајн коцкањето, но според нив, актуелното законско решение оди во спротивна насока.

— реклама —

Во соопштението се посочува дека особено спорен е членот 7 став 4 од предлог-законот, каде, според Левица, не е јасно дефинирано кој и под кои услови ќе може да учествува во приредувањето на онлајн игрите на среќа.

Партијата тврди дека наместо борба против коцкањето, се создава простор за, како што наведуваат, „тивка приватизација“ и политички договори зад затворени врати.

— реклама —

Левица додава дека Македонија станува држава преплавена со коцкарници и обложувалници, при што, според нив, најголем профит имаат мал број моќници и компании, додека граѓаните остануваат социјално и економски ранливи.

— реклама —

Од партијата повикаа на носење јасен и строг закон кој вистински ќе го ограничи коцкањето и ќе го стави јавниот интерес пред партиските и бизнис интересите.