„Насекаде имаше куфери, тела и искршени прозорци“: Новинар раскажува за ужасот по судирот на возовите во Шпанија

Новинарот на шпанскиот весник „Ел Паис“, Антонио Хименес Барка, бил во возот на „Ренфе“ кој вчера се судрил со воз на „Ирио“ во близина на Урда, во покраината Толедо, Шпанија. Во несреќата загинале најмалку 68 лица, а повеќе од сто биле повредени. Тој ги опишал првите моменти по судирот, кога од патник станал сведок на една од најтешките трагедии во својот живот.

Барка раскажува дека непосредно пред несреќата бил во возното кафуле и нарачал кафе. Следното што го памети е силен удар, по кој се нашол на подот на вагонот, на спротивниот крај од местото каде што седел. Првично мислел дека поминал без сериозни повреди, но кога го пронашол мобилниот телефон прекриен со крв, сфатил дека и самиот е повреден.

— реклама —

И покрај раната, се јавил кај сопругата и ѝ раскажал што се случило, уверувајќи ја дека е добро. Околу него имало повредени патници, меѓу кои постар маж кој тешко дишел и друг со скршена рака. Откако излегле од вагонот, патниците се нашле во бадемова насадба, каде што на почетокот владееле тишина и чувство на нереалност.

— реклама —

Сликата се променила кога слушнал жена како вреска и плаче. Тогаш се сетил на претходната железничка несреќа кај Адамуз, за која известувал како новинар, и на разговорите со жртвите. Не можел да поверува дека сега и самиот е дел од слична трагедија.

Додека повредените се обидувале да си помогнат, Барка фотографирал, испраќал гласовни пораки и ја известувал редакцијата за случувањата. Во еден момент забележал маж кој сам плачел меѓу дрвјата. Мажот, Антонио Лусена од Кордоба, му рекол дека има три мали деца и дека плачејќи помислил дека можел засекогаш да ги загуби. Барка го прегрнал и се обидел да го утеши.

— реклама —

На местото на несреќата пристигнале припадници на Цивилната гарда, полицијата, пожарникари, лекари и доброволци. Новинарот го видел најтешко оштетениот вагон, претворен во куп искривен метал, опкружен со куфери, тела и искршени прозорци. Сведочел дека секој од преживеаните во редот за превоз до блиското населено место носел своја потресна приказна.

Подоцна бил пренесен во спортска сала во Урда, каде што му ја преврзале раната. Кога отишол до шанкот и побарал кафе, го забележал повторно Лусена. Двајцата се прегрнале во тишина и си размениле насмевки, без да кажат ниту збор.

Барка вели дека повторно го обзело чувството дека живее во лош сон, како да не требало ниту тој ниту кој било друг да се најде на тоа место.