Левица преку соопштение обвини дека со недонесувањето на новиот Изборен законик не се изгубени само околу четири милиони евра европски средства, туку дека на сила останува системот преку кој најголемите политички партии ќе поделат околу 10 милиони евра државни пари за платено политичко рекламирање.
Од партијата велат дека во текот на работата на Работната група единствено тие доследно се залагале за воведување една изборна единица и укинување на платеното политичко рекламирање, оценувајќи дека токму тоа би значело вистинска демократизација на изборниот процес.
Според Левица, ДПМНЕ во завршната фаза од преговорите го наметнала прашањето за гласањето на дијаспората како главен услов за договор, иако, како што тврдат, тоа не било дел од четиримесечната работа на Работната група.
Од партијата потсетуваат дека една изборна единица била едно од ветувањата на ДПМНЕ, но наместо да ја реализира оваа реформа, владејачката партија, според нив, ја заменила со друга тема.
Левица наведува дека понудила компромис – гласањето по пошта да се примени на претседателските избори, доколку ДПМНЕ ја прифати една изборна единица, но таквиот предлог не бил прифатен.
Во соопштението се посочува дека Левица ги повикала сите опозициски партии на координација околу изборните реформи, но дека СДСМ не присуствувала на состанокот.
Од партијата оценуваат дека со останувањето во сила на постојниот Изборен законик продолжуваат да важат шесте изборни единици и системот на платено политичко рекламирање, кој, според нив, им обезбедува финансиска предност на најголемите партии.
Левица додава дека рокот за донесување на нов Изборен законик не значи дека реформите повеќе не можат да се спроведат и најавува дека ќе продолжи да се залага за воведување една изборна единица и укинување на платеното политичко рекламирање.
