„Никој не може да го избрише македонскиот јазик од светската културна ризница, се грижиме за негова достојна афирмација“, вели Јаневска

Македонскиот јазик има свое цврсто место во светската културна ризница, а неговото зачувување, изучување и меѓународна афирмација остануваат важна институционална обврска, порача министерката за образование и наука Весна Јаневска на свеченото отворање на 59. Летна школа на Меѓународниот семинар за македонски јазик, литература и култура во Охрид.

Јаневска истакна дека образованието и науката се темелите преку кои се обезбедува иднината на јазикот и културата, посочувајќи дека институционалната грижа за македонскиот јазик се зајакнува преку образовниот систем и поддршката на научно-истражувачката работа.

— реклама —

„Образованието и науката се цврстите темели врз кои се гради иднината на секој јазик и култура. Во таа насока, расте и институционалната грижа за македонскиот јазик, делуваме кон јакнење на темелите“, рече Јаневска.

Таа посочи дека учениците од прво до петто одделение изучуваат македонски јазик со 180 наставни часа годишно, додека од шесто до деветто одделение предметот се изучува четири дена неделно, како и во гимназиското образование. Министерството, како што нагласи, обезбедува современи учебници и ги охрабрува учениците да творат на македонски јазик.

— реклама —

Дополнително, се поддржуваат научно-истражувачки проекти поврзани со македонскиот јазик, а со секој нареден буџет се издвојуваат повеќе средства за оваа намена. Се доделуваат и стипендии за студенти кои се запишуваат на прв, втор и трет циклус на студиски програми поврзани со македонскиот јазик.

Јаневска се осврна и на растечкиот интерес за македонистиката надвор од земјава. Таа посочи дека се зголемува бројот на странски универзитети каде што се изучуваат македонскиот јазик и култура. Во април годинава, како што информираше, бил обновен најстариот лекторат во Неапол, а лектори биле ангажирани и во Хрватска, Кина, Романија, Полска, Албанија и Словачка.

— реклама —

„Македонскиот јазик, преку духовното наследство, е веќе вграден во светската културна ризница. Тоа не може да се избрише, но може да се збогати“, порача министерката.

На Летната школа учествуваат семинаристи од различни земји, со заедничка цел да ги продлабочат своите знаења од областа на македонистиката и поблиску да го запознаат македонскиот јазик, литературата и културата.

— реклама —

Според Јаневска, токму преку живата употреба на јазикот, научната работа и културната размена се создаваат нови пријателства и се зголемува кругот на луѓе кои го изучуваат и го сакаат македонскиот јазик.

„Македонскиот јазик ќе остане жив преку луѓето кои го говорат, преку институциите каде се истражува, преку културните дела што патуваат надвор од границите и преку овој семинар кој ја зајакнува неговата меѓународна видливост“, додаде Јаневска.