Франција од утре повторно ќе биде погодена од силен топлотен бран, а екстремно високите температури дополнително ќе ги отежнат напорите за справување со пожарите, предупреди националната метеоролошка служба „Метео Франс“.
Според прогнозите, најголем дел од земјата ќе биде зафатен од интензивни горештини, при што врвот на топлотниот бран се очекува во среда, 29 јули.
Метеоролозите прогнозираат дека температурата во Париз и Тур ќе достигне до 38 Целзиусови степени, во Лион и Гренобл до 36 степени, додека на југозападот на земјата, каде што пожарникарите се борат со големи пожари во регионите Жиронд и Ланд, се очекуваат температури и до 40 степени.
За четврток се прогнозира топлотниот бран постепено да се премести кон источниот дел на Франција, но високите температури ќе се задржат во поголемиот дел од земјата во текот на целата недела.
Засега не е познато колку долго ќе трае овој бран на екстремни горештини.
Ова е четврти топлотен бран што ја погодува Франција ова лето и вкупно 54-ти регистриран на национално ниво од 1947 година.
Според дефиницијата на „Метео Франс“, топлотен бран претставува период од неколку последователни денови со невообичаено високи температури.
