Трговскиот спор меѓу САД и Канада дополнително се заострува откако американскиот претседател Доналд Трамп најави дека од 1 јануари 2027 година царините за канадските автомобили, камиони, автомобилски делови и челик ќе бидат зголемени на 50 отсто.
Трамп преку својата мрежа Truth Social ја обвини Отава дека „со години ги поткрадува САД“, откако пропаднаа преговорите за трговски договор меѓу двете земји.
„На 1 јануари 2027 година царините на сите автомобили, камиони, автомобилски делови и челик ќе бидат зголемени на 50 отсто“, напиша Трамп.
Најавата доаѓа по неуспешните преговори за договор со кој требаше да се избегнат царини од 50 отсто за одредена канадска стока. Двете страни меѓусебно се обвинија за обиди за промена на условите во последен момент.
Канадскиот премиер Марк Карни изјави дека неговата влада била принудена да се откаже од, како што го нарече, „лошиот“ договор.
„Не можеме да го прифатиме она што го понудија, ниту ќе го дадеме она што го бараа“, порача Карни.
Новите американски царини, кои стапија во сила пред два дена, опфаќаат канадска стока во вредност од околу 20 милијарди долари. Карни најави дека Канада ќе возврати со соодветни мерки за да ги заштити своите работници и компании.
Според него, канадските контрамерки ќе ги опфатат секторите како што се челикот, млечните производи, домашните апарати, земјоделската опрема, целулозата и хартијата, како и електрониката.
Канцеларијата на американскиот трговски претставник прекинот на преговорите го оцени како „пропуштена можност“ за Канада, обвинувајќи ја Отава за „долготрајна одмазда“ против САД.
Трамп дополнително ги нападна канадските царини за американските земјоделски производи, оценувајќи ги како „смешно високи“, и порача дека Вашингтон повеќе нема да се однесува кон Канада „како кон сојузна држава“.
Американскиот претседател во повеќе наврати ја споменуваше и можноста Канада да стане „51. сојузна држава“ на САД, што дополнително ги заостри односите меѓу двете соседни земји.
