Десетици мигранти повторно се спасени во близина на грчкиот остров Крит, додека грчките власти предупредуваат на зголемен миграциски притисок од Либија кон јужниот дел на земјата.
Според официјални податоци, во понеделникот биле спасени 143 лица од четири пловни објекти кои се нашле во неволја јужно и југоисточно од островот Гавдос. Ден претходно, уште 42 мигранти биле извлечени од море од трговски брод во истиот регион, откако испловиле од областа околу Тобрук.
Грчките власти проценуваат дека од почетокот на годинава околу 10.000 мигранти нелегално влегле во земјата по копнен и морски пат, при што речиси половина од нив тргнале токму од Либија. Останатите пристигнале преку Турција.
Министерот за миграција Танос Плеврис предупреди дека владата би можела да воведе „многу строги мерки“ доколку продолжи зголемениот прилив на мигранти од северноафриканската држава. Тој изјави дека најголем дел од лицата кои моментално пристигнуваат се од Бангладеш и Египет, кои вообичаено не ги исполнуваат условите за добивање бегалски статус.
Атина веќе подолго време се обидува да воспостави поефикасна соработка со властите во источна Либија за спречување на заминувањето на мигрантските чамци, но досегашните напори не дале значајни резултати.
Според Плеврис, соработката со Турција дала подобри резултати, па миграциските текови во источниот дел на Егејското Море се намалени за околу 70 проценти. Во минатото, токму рутата од турскиот брег кон грчките острови Лезбос, Самос и Кос беше една од најкористените за нелегален влез во Европската Унија.
За време на големата мигрантска криза во 2015 година, преку Турција во Грција пристигнаа речиси еден милион луѓе на пат кон другите земји од Европа.
