Општина Центар најави воведување нови дигитални услуги за паркирање, со кои граѓаните ќе можат побрзо и полесно да ги користат услугите, без потреба од чекање на шалтери.
Според најавите, ќе бидат развиени мобилни апликации преку кои корисниците ќе можат да поднесуваат барања, да го следат статусот на услугите, да добиваат известувања и полесно да комуницираат со ЈП „Паркинзи на Општина Центар“.
„Дигитализацијата е клучна алатка за подобрување на процесот на паркирање. Работиме на нови мобилни апликации преку кои корисниците ќе бидат целосно информирани и ќе можат брзо и лесно да ги користат услугите“, изјави градоначалникот Горан Герасимовски.
Во рамки на проектот се планира и поставување сензорски системи кои во реално време ќе ја прикажуваат зафатеноста и достапноста на паркинг-местата. Системот ќе се воведува постепено, најпрво во монтажните гаражи, затворените паркиралишта и на најфреквентните локации.
Директорот на ЈП „Паркинзи на Општина Центар“, Душко Коцевски, информира дека паралелно ќе се унапредуваат контакт-центарот и теренската контрола, со цел побрзо постапување по пријавите и поголемо користење на електронските услуги.
Тој најави и дополнителна поволност за граѓаните кои ќе аплицираат онлајн.
„Еднократниот надоместок за склучување договор, кој досега изнесуваше 350 денари, ќе биде бесплатен за сите што ќе аплицираат електронски. Очекуваме значително зголемување на бројот на онлајн корисници и намалување на гужвите на шалтерите“, истакна Коцевски.
