Објавена набавка за 100 нови амбулантни возила вредна 461 милион денари

Министерството за здравство објави јавна набавка за 100 нови амбулантни возила со надградена медицинска опрема, кои ќе бидат распределени во јавните здравствени установи низ државата, соопшти министерот за здравство Азир Алиу.

— реклама —

Инвестицијата е вредна 461.250.000 денари, а во тек е законскиот рок за поднесување понуди од заинтересираните компании.

— реклама —

Според министерот Алиу, новите возила ќе придонесат за значително подобрување на капацитетот на здравствениот систем за одговор при итни состојби.

„Набавката на 100 нови амбулантни возила значително ќе го унапреди капацитетот на здравствениот систем за одговор при итни состојби и ќе овозможи побрза и поефикасна интервенција со брз и навремен транспорт на пациенти до соодветните здравствени установи“, изјави Алиу.

— реклама —

Тој посочи дека возилата ќе бидат опремени со современа медицинска опрема, а нивната распределба ќе овозможи подобра покриеност на територијата, со посебен акцент на руралните средини.

Оваа набавка е дел од поширок процес на модернизација на итната медицинска помош и јакнење на здравствениот систем, со цел обезбедување побрз и поефикасен одговор во кризни ситуации.